दिवाळी पहाट कस्तुरीच्या स्वरांनी बहरली

दिवाळीची पहाट २७ आक्टोबर दिवाळी पाडवा पुण्यातल्या निवारा वृध्दाश्रमातल्या सभागृहात अहिर भैरव स्वरांच्या आवर्तनाने रंगत गेली.
बाहेर फटाक्यांची आतशबाजी तर सभागृहाच्या आवारात सकाळच्या रागांचे स्वर...
कस्तुरी पायगुडे-राणे यांच्या या दिवाळी मैफलीने स्वरांना सकाळच्या सूर्याला अर्घ्य देत उपस्थित रसिक मंडळींना
हा आस्वाद दिला तो सांस्कृतिक पुणेच्या सुभाष इनामदार यांनी...
स्वरांच्या झंकारत रसिकांच्या मनात रसिया म्हरो...या बंदिशीने घर करुन ते सकाळच्या रागाचा आस्वाद घेत होते.
पुण्यात दिवाळीच्या निमित्ताने विविध दिवाळी पहाट आयोजित केल्या होत्या...तरीही निवारा मधल्या दीपस्वरांनी...स्वतःचे वेगळेपण जपत.शास्त्रीय गायनाची ही मैफल रंगत होती.
बेग बेगा आओ मंदिर या एकतालातल्या शब्दांनी आरती अंकलीकर टिकेकर यांच्या या शिष्येने आपल्या आवाजी बाजाचा उत्तम आविष्कार सादर केला.

जरा येई रे बाहेरी भघ आसपास
दाही दिशात दाटला आनंद उल्हास
या शांता शेळकेयांनी केलेल्या दिवाळीच्या कवितेच्या ओळी सुभाष इनामदार रसिकांमसोर सादर करीत होते...तेव्हा त्याही शब्दांना तेवढीच दाद टाळ्यांनी मिऴत गेली.
आधी राग अहिरभैरव आणि नंतर निर्गुणी भजनानी कस्तुरी पायगुडे- राणे यांनी आपल्या सुरेल स्वरातून आगळ्या रचना सादर करुन मोहवून सोडले.
अवघा रंग एकची झाला...या अभंगाने रसिकांची मने गुंगवून सोडली.
स्वरातली नादमधुरता, नितळ आवाज, पारदर्शी शब्द, शब्दातली भाव त्या नेमक्या सादर करतात याचा प्रत्यय या पहाटेच्या मैफलीत आला. हा योग जुळवून आणल्याबद्दल अनेक रसिक सांस्कृतिक पुणेचे अभिनंदन करत होते.
कार्यक्रमाली हार्मोनियमची साथ केली ती स्वानंद कुलकर्णी यांनी , तर तबल्यावर समर्थ पणे सिध्द होते ते गणेश तानवडे... तंबोरा साथीला कस्तुरी पायगुडे यांच्या शिष्या कल्याणी शेटे, आभा पुरोहित यांची साथ लाभली होती.

याच निमित्ताने राम पायगुडे गेला ३५ वर्ष सातत्याने काढत असलेल्या रंगतरंग या दिवाळी अंकाचे प्रकाशन सांस्कृतिक, सामाजिक क्षेत्रातले कार्यकर्ते रवि चौधरी यांच्या हस्ते करण्यात आले.